සැලසුම් සහගතව සිදුකළ ඝාතනයකින් පසු පලාගිය ඝාතකයා අත්අඩංගුවට

වයස අවුරුදු 67ක් වූ අක්කරකාල්ගොඩ, ලුණුගම්වෙහෙර ප්‍රදේශයේ පදිංචිකරුවෙකු තියුණු ආයුධයකින් පහරදී ඝාතනය කර ඇති බවට ලුණුගම්වෙහෙර පොලිස් ස්ථානයට ලද පණිවුඩයක් සම්බන්ධයෙන් විමර්ශනයක් ආරම්භ කර ඇතැයි පොලීසිය පැවසීය.

මියගිය පුද්ගලයා යතුරුපැදියකින් ගමන් කරමින් සිටියදී, කැබ් රථයකින් පැමිණ යතුරුපැදිකරු හප්පා අනතුරක් සිදු කර යතුරුපැදිකරු මාර්ගයෙන් ඉවතට විසිවීමෙන් අනතුරුව සැකකරු විසින් කැබ් රථය නවතා වැටී සිටි තුවාලකරු අසලට ගොස් පොරවකින් පහරදී ඝාතනය කර නැවත කැබ් රථයෙන් පලා ගොස් ඇති බවට දැනට සිදුකරන ලද විමර්ශනයේදී අනාවරණය වී ඇත. මේ වන විට මෘත ශරීරය හම්බන්තොට රෝහලේ මෘත ශරීරාගාරයේ තැන්පත් කර ඇත.

සිදුවීමට සම්බන්ධ වයස අවුරුදු 27ක් වන සැකකරු ඝාතනය සඳහා යොදාගත් පොරව සහ ඔහු පැමිණි කැබ් රථය අත්අඩංගුවට ගත් බව පොලීසිය පැවසීය. ලුණුගම්වෙහෙර පොලීසිය වැඩිදුර විමර්ශන සිදුකරනු ලබයි.