අල්ලක් තරම් ඉඩමක මල්ලක් පිරෙන්න වවන හැටි

කෘෂිකර්මය පිළිබඳව උගතුන්ගේ පුරෝකථනයන්ට අනුව ඉතා නුදුරු අනාගත කාලයකදී ඇති වේ යැයි කියන ආහාර  හිඟකම නිසා ජන ජීවිතයට ඇති කරන බලපෑම්, කෙරෙහි වර්තමානය තුළ කතිකාවතක් පවතින මෙම අවධියේ අඩු ඉඩකඩකින් බෝග වගා කර රටේ ආහාර සුරක්ෂිතතාව පිළිබඳව අපි අපිටම වගකියාගත හැකි නම් එය කෙතරම් අගනේදැයි වචනයෙන් අපිට විස්තර කර දිය නොහැකි මහඟු කාර්ය භාරයක් වනු නොඅනුමානය.

අඩු ඉඩකඩක් නිර්මාණය වී ඇත්තේ අපට ඇති බිම් ප්‍රමාණයේ නිවෙසකට කොටසක් වෙන්වී තිබීම නිසා විය හැකිය. හිමි ඉඩමේ ඉතා සීමිත කොටසක් වගාව සඳහා යොදාගත හැකි වීම, නිතර නිතර උල්දිය දමන කොටසක් වීම හෝ ස්ලැබ් එකක් මත පමණක් වගාවට ඉඩක් තිබීමක් විය හැකිය.

කෙසේ වෙතත් අඩුවට තිබෙන ඉඩකඩේ දවසට එක වේලක් හෝ සපයාගත හැකි ලෙස බෝග වගා කිරීම කෙරෙහි අපිට ධනාත්මක ආකල්පයන් ඇති කරගත හැකි නම් ඒ සඳහා වගා කරගන්නා ක්‍රමවේදයන් පිළිබඳව අපි දැනුවත්ව සිටීම ඉතාම වැදගත් කොට සැලකිය යුතු නිසා මෙම ලිපිය ඒ සඳහා මාර්ගෝපදේශයක් සපයනවා විය හැකිය.

ඉඩකඩ අඩු බිමක තිබෙන්නේ සරු පසක් හෝ නිසරු පසක් විය හැකිය. සරු පසක් නම් කෙළින්ම පස මත බෝග සිටුවාගත හැකිය. බෝග තෝරා ගැනීමේදී

හිරු එළිය නිවැරැදිව භාවිත වන ආකාරයට සිදුකරගත යුතුය. පොල්, අඹ, වැනි බහුවාර්ෂික බෝග වගාවන් වටා පොල්ලෙලි අල්වා ගොටුකොළ, මුකුණුවැන්න වැනි බෝග සිටුවා ගත හැකිය. විවෘත පසේ වළවල් කපා (අඩි 1× අඩි 1 × අඩි 1 දිග ගැඹුර, පළල ගැඹුර) මූලික පොහොර සමඟ මතුපිට පස කලවම් කර වළවල් පුරවා පැළ /ඇට/ දඬු/ අල / බීජ සිටුවාගත හැකිය. වැල් වර්ග වැට දිගේ යැවීමටත් අතරින් පතර කෝටු සිටුවා ඒවා තුළත් වැල් වර්ග යැවීම කළ හැකිය. (දඹල, මෑකරල්, වැටකොළු, /පතෝල,  කරවිල) අඩු ඉඩකඩක් පවතින නිසරු පස් පවතින අවස්ථාවල / ජලයෙන් පස් යටවන අවස්ථාවල / ස්ලැබ් එකක වගා කරන විට වැඩි වශයෙන් බඳුන් තුළ වගා කරන්නේ නම් උචිතය. කළුපාට /සුදු පාට පොලිතින් බඳුන් (විෂ්කම්භය අඟල් 14, උස අඟල් 12) ඉවතලන පොලිසැක් හාල් පැකට්, ඉවතලන මලු/කිරි හට්ටි/ ප්ලාස්ටික් බඳුන්/ ටින්/ බැරල්/ ටයර්, එල්ලෙන බඳුන් ලෙස ඉවතලන වතුර බඳුන්/ බෝතල් භාවිත කළ හැකිය.

තිරස් වගාවට වැහිපීලි, එස්ලෝන් බට, ප්ලාස්ටික් බෝතල් සහ සිරස් වගාවට බඳුන් වර්ග / වගා මලු/කොහුබත්, වගා මලු බටවලින් සැකසූ ආකෘති / බැරල්, ලී දඬු භාවිත කර කොහු ආධාරයෙන් සැකසූ ආකෘති යොදාගත හැකිය. මෙම බඳුන් සියල්ලේම වැඩි ජලය බැස යෑමට අවශ්‍ය සිදුරු ක්‍රමවත්ව සකසා ගත යුතුය.

අඩු ඉඩකඩක් තිබෙන ස්ථානයක පොහොර සපයා ගැනීම කළ යුතු ආකාරය පිළිබඳව සාකච්ඡා කරන විට නිවෙසින් ඉවත් කරන පොලිතින් හැර සියල්ලම මුළුතැන්ගෙයින් ඉවත් කරන ද්‍රව්‍ය එකතු කර බැරලයක් භාවිත කර හෝ ඒ ආකාරයේ ආකෘතියකට ලී බැඳ සකස් කරන උපකරණයකට එකතු කර කොම්පෝස්ට් සකස් කර ගැනීම කළ හැකිය.

අතුගා ඉවත් කරන ද්‍රව්‍ය, වැට කපා ඉවත් කරන ගස් කොළ වර්ග සියල්ල එකතු කළ විට මාස 3කට පසු කොම්පෝස්ට් නිෂ්පාදනය කරගත හැකිය. මේ සඳහාත් අවටින් සත්ත්ව පොහොරද අවශ්‍ය නම් එකතු කරගත හැකිය.

මෙම සකස් කරගත් පොහොර මූලික පොහොර ලෙස වගා මලු පිරවීමට සහ වළවල් පිරවීමට යොදාගත හැකිය. වෙළෙඳපොළෙන් මිලදී ගත හැකි වැඩිදියුණු කළ කාබනික කැට / පොහොර වර්ග (බයෝ කාබන් Biocarbon) ඉකෝ පර්ට් (ECO pert) කොම්පෝස්ට් වර්ග (සරු, ඉසුරු) සහ යාරමිලා කොම්ප්ලෙක්ස් වැනි යාරා වර්ග, (කැට පොහොර) අවශ්‍ය නම් කොම්පෝස්ට් වර්ග සමඟ මිශ්‍ර කර මූලික පොහොර ලෙස සකස් කරගත හැකිය.

කුඩා ඉඩකඩක ඉක්මනින් ඵලදාව ලබාගත හැකි බෝග වර්ග, නිවෙසේ පරිභෝජනයට ආහාර වේලක් සපයාගත හැකි වර්ග  තෝරා ගැනීමට මෙම අවධියේ විමසිලිමත් වීම ඉතා වැදගත්ය. ඉවතලන පොලිසැක් හාල් බෑග්වල මඤ්‍ෙඤාක්කා, බතල, කිරිඅල, සිටුවා ගැනීම (බතල වැල ඉහළට වර්ධනය වීමට සකස් කරදීම බෑගය තුළ අල එරීමට ඉතා වැදගත්ය.)

පොලිතින් බෑග්වල / පොලිසැක් කුඩා බෑග්වල මිරිස් පැළ කිහිපයක් මාළු මිරිස් පැළ කිහිපයක් /තක්කාලි / කොච්චි / නයි මිරිස්  වම්බටු පැළ කිහිපයක් සිටුවා ගැනීම ඉතා වැදගත්ය.

වැට දිගේ ඉඩ තිබෙන ආකාරයට දඹල, වැටකොළු, පතෝල, කරවිල, වට්ටක්කා, පිපිඤ්ඤා, මෑ වර්ග සිටුවා ගත යුතුය. බැරල්වල, කිලෝ 50 පොලිසැක් බෑග්වල කතුරුමුරුංගා / මුරුංගා පැළයක් සිටුවාගත හැකි නම් එය කොළ ඵලදාවක් ලෙස යොදාගත හැකි අතර මුරුංගා කරල් ආහාරයට ගත  හැකිය. තිරස්ව සකස් කරගත් වැහි පිහිලි, එස්ලෝන් බට යොදාගෙන සකස් කරගත් ආකෘතිවල සිරස්ව සකස් කරගත් ආකෘතිවල (වගා මලු) භාවිත කර කොළ එළවළු, නිවිති, ගොටුකොළ, මුකුනුවැන්න, කංකුන් වර්ග සිටුවාගත හැකිය.

කුඩා බඳුන් වලරාබු / ගෝවා / රතු අල (බීට්) සිටුවාගත හැකිය.

බෝග වර්ග සිටුවා ගැනීමේදී අනුගමනය කළ යුතු ක්‍රියාමාර්ග ගැන සැලකීමේදී, පොහොර යෙදීම්, පැළ සිටුවීම, ඇට සිටුවීම, නඩත්තු කිරීම ගැන, මෙන්ම රෝග, පළිබෝධ පාලනය කෙරෙහි සැලකිලිමත් වීම වැදගත්ය. මතුපිට පස් පුරවන ලද යෝගට් කෝප්ප, කුඩා පොලිතින් බෑග්, ඉවතලන කුඩා බෑග්වල බෝගවල ඇට සිටුවිය හැකිය. එමෙන්ම මේවාට දිනපතා ජලය එකතු කිරීම ගැන, සිසිල් සෙවණ ඇති ස්ථානයක තබාගැනීම, සහ ඇට ගැලවී කොළ කිහිපයක් පැමිණි පසු ස්ථිරවම බෝගය සිටුවන පසට හෝ බඳුන්වලට පැළය මාරු කිරීමද වැදගත්ය. මෙම බඳුන් මතුපිට පොහොර වලින් පුරවා තිබීම කළ යුතුය. ඒ අනුව කොම්පෝස්ට්, සත්ත්ව පොහොර කොටස් 2ක් මතුපිට පස් කොටස් 4ක්, කැට පොහොර කුඩා ප්‍රමාණයක් (5ඨ-10ඨක්) වැලි කොටස් 1/2,  කොහු බත් තිබේ නම් කොටස් 1/2ක් යන මිශ්‍රණයට අනුව මිශ්‍ර කළ යුතුය. 

නැවත සති 2කට හා සති 4කට පසු  ඉහත මිශ්‍රණයට පැළවල මුලට මඳක් දුරින් බඳුන්වලට එකතු කිරීම, බෝග වගාවේ වර්ධනය මෙන්ම ඵලදාව වැඩි කරලීමට හේතුවක් බවට දැක්විය හැකිය. වර්ධනය මඳ බවක් දක්නට ලැබේ නම් වෙළෙඳපොළෙන් මිලදී ගන්නා යාරා (කොළ කැට පොහොර) යොදාගෙන නයිට්‍රජන් පොහොර බඳුනට හෝ පසට ලබාදීම වැදගත්ය. ඵල එන විට වෙළෙඳපොළෙන් මිලදී ගන්නා කැට පොහොර, (සුපර් කේ, මියුරෙට් ඔෆ් පොටෑෂ්) කුඩා ප්‍රමාණයක් එකතු කරගත හැකිය.

කුඩා බඳුනකින් විශාල බඳුනකට පැළ මාරු කිරීමේදී මුල්වලට හානියක් ඇති නොවන පරිදි සිටුවීමට වගබලා ගත යුතුය. මුල් හානිවී ඇති විට පස තුළ සිටින ක්ෂුද්‍ර ජීවීන් (රෝග කාරක) ඒ තුළින් ශාකය තුළට ඇතුළු වී රෝග ඇති කරයි.

දිනපතා ජල සම්පාදනය කිරීම ඉතා වැදගත්ය. විශේෂයෙන් බඳුන්වල නිතරම පස වියළිව ඇත්දැයි පරීක්ෂා කර ජලය එකතු කිරීම වැදගත්ය. උදය වරුවේ ජලය එකතු කිරීම බඳුන්වල පැළ සිටුවීමේදී ඉතා වැදගත්ය.

හිරු රශ්මියට හුරුවන තෙක් සෙවණ ස්ථානයක තබා දින කිහිපයකින් හොඳින් හිරු එළිය ලැබෙන සේ බෝග වර්ග රැක බලා ගැනීම හොඳ ඵලදාවක් ලබා ගැනීමට හේතු වේ.

ඉඩකඩ අඩු බිමක වගා කිරීමේදී ඇති වෙන බාහිර ගැටලුවලින් ප්‍රධානතම ගැටලුවක් වන්නේ රෝග පළිබෝධ හානිවලට බෝග වගාව ලක්වීම, ආදායම් ලබා ගැනීමට නොහැකිවීම, වගාව තවදුරටත් එපාවීම දක්වා යන එක සිදුවිය හැකියි. මේ නිසාත් නිවෙස අසල පවතින වගාවක් නම්, කෘෂි රසායන ලෙස රසායනික කෘමි නාශක, වල් නාශක භාවිතය, දිලීර නාශක භාවිතය අයහපත් ප්‍රතිඵල ගෙන දෙන්නක් වීමය. මේ නිසා ස්වභාවික දිලීර නාශක හෝ කෘමිනාශක භාවිතය තුළින් වගාව තවදුරටත් පවත්වාගෙන යෑම සෞඛ්‍යයට ඇති කරන බලපෑම් අවම කරයි.

ස්වාභාවික දිලීර නාශකයක් ලෙස කුරුඳු කොළ ග්‍රෑම් 250ක් කොටා වතුර ලීටර් 5ක දිය කර සබන් කුඩු ග්‍රෑම් 5ක් එකතු කර සාදාගන්නා මිශ්‍රණය යෙදීම ඉතා හොඳින් රෝග මර්දනය කරගත හැකිය. වගාව පටන් ගත් දා සිටම මෙය ස්ප්‍රේ කිරීම කරන්නේ නම් වගාව පුරාවට දිලීර මඟින් රෝග ඇති වීම වළක්වාලන්නට හැකිය.

ස්වාභාවික කෘමිනාශකයක් ලෙස කොහොඹ ග්‍රෑම් 250ක් කොටා වතුර ලීටර් 5ක දිය කර සබන් කුඩු ග්‍රෑම් 5ක්, කොහොඹ තෙල් මිලි ලීටර් 5ක් එකතු කර සාදාගන්නා මිශ්‍රණයක් මඟින් වගාව ආරම්භයේ සිටම කෘමි සතුන්ගේ විකර්ශකයක් ලෙස ක්‍රියාකිරීම මඟින් පළිබෝධකයන් පැමිණීම වළක්වයි.

කැකිරි, වැටකොළු, පතෝල, මල් පරාගනය වූ වහාම පොලිතින් ආවරණයක් යෙදීම මඟින් ඉල් මැස්සාගේ හානිය වළක්වා ගත හැකිය. වට්ටක්කා, කැකිරි, පිපිඤ්ඤා ගෙඩි පස තුළම ආවරණය කිරීම තුළ ඉල් මැස්සාගේ හානිය වළක්වා ගත හැකිය.

තමන්ට විශ්වාසදායක විධිමත්ව කරන ලද බෝග වගාවක් නිසා තම පවුලේ පෝෂණ අවශ්‍යතාව ඉටු කර වෙළෙඳපොළටත් ලබාදී අමතර ආදායමක් ලබාගත හැකිය. ඉදිරියට ඇතිවීමට හැකි යැයි අනුමාන කරන ආහාර අර්බුදය වළක්වා ලීමට අප සැමගේම යුතුකමක් ලෙස සලකා අපිට හැකි ආකාරයෙන් දායක වීමට මෙම උපදෙස් මාලාව ඔබට උපකාරයක් කරගනු ඇතැයි බලාපොරොත්තු වෙමි.

කෘෂි උපදේශක නීල් පෙරේරා

උපුටා ගැනීම මව්බිම