හතරකේන්දරේ ගැන විමසමින් ප්‍රේම සම්බන්ධතා කඩාකප්පල් කිරීමට යෑම නිසා සදහටම මවුපියන් අත්හැර දමන බව කියමින් නික්ම ගිය ඇතැම් දූ දරුවන් සැපවත් විවාහ ජීවිත ගත කරමින් සිටියි. ඔවුනොවුන් දැන හැඳින ගෙන කාලයක් ගතවූ විට කේන්දර නොගැළපීම නිසා විවාහයට ඉඩ නොදෙන බව පැවසීම පවුලේ ප්‍රශ්න ඇතිවීමට හේතුවකි.
ඉක්මන් තීරණ එපා!කේන්දරයක නැත්නම් හඳහනක පිහිටි ලග්නයේ 4, 7, 10 යන ස්ථානවල ග්‍රහයන් නොමැතිවිට හතරකේන්දරේ පාළු බවට නිගමනය කර තිබේ. (කේමදාම යෝගය) 5,9 යන ස්ථාන හඳහනේ ප්‍රබල ස්ථානයි. පස් වැන්නේ භාග්‍ය සහ සහකරුගේ හෝ සහකාරියගේ වාසනාව ද දරුවන්ගේ සතුට හා ඉගෙනීමත් ඥාන ශක්තියත් පෙන්වනවා 9 වැන්නෙන්. පෙර පින් බලය, ආගමික භක්තිය, උසස් අධ්‍යාපනය හා ශරීරය ආශ්‍රිත ප්‍රදේශය පෙන්නුම් කරන ධර්මස්ථාන ද වේ. 5, 9, ස්ථානය උච්ච ස්වක්ෂේත්‍රව පිහිටා ඇත්නම් එම පාළුව මඟහැරී යයි. ලග්න කේන්ද්‍රයේම හතරකේන්දරයේ පාළුව තිබුණත් නවාංශක කේන්දරයේ 1,4,7, 10 හිස් නොවී තිබේනම් දෝෂ නොවන බවටත් මතයක් පවතියි. හතර කේන්දරය පාළු වුවත් උපතේදී සඳු සිටි රාශියෙන් 4,7,10 හිස් නොවී තිබේ නම් දෝෂ නොවන බව නක්ෂත්‍රයේ පෙන්වා දී තිබේ.
කේන්දරයේ 2,6,8, 12 යන ස්ථානවල සියලු ග්‍රහයන් සිටිවිට සිංහාසන නම් ප්‍රබල ග්‍රහයෝගය යෙදේ. එම යෝගය යෙදුණු විට රජකු හා සමානව බලවත් වන වාසනාවන්තයකු වේ. මේ නිසා හතරකේන්දරය පාළු යැයි බැලූ බැල්මට කියමින් කේන්දර හිමියා ගැන නොමනා සිතුවිලි ඇති කර ගැනීම ඉතා බොළඳ ක්‍රියාවකි.එසේම හතර කේන්දරයක බලවත් රාශි දෙකක් වන 5, 9 , ත්‍රිකෝණ බලයක් දේ. හතරකේන්දරයේ ග්‍රහයන් හිස්වන විට 2, 12, 6,8, සියලුම ග්‍රහයෝ එක්ව සිටින අවස්ථා ද ඇත. එය සිංහාසන යෝගය යෙදී තිබීමකි.හතරකේන්දරය පාළුවීමෙන් 3,5,11,9, යන ස්ථානවල ග්‍රහයන් තැන්පත්වීමක් ඇතිවුවහොත් ඥානාලෝක බලය යෙදේ. එය එක ශ්‍රැතිධර යෝග බලයයි. අන් අයට වඩා මතක ශක්තිය පවතින බලයකි. එම බලය මහා ප්‍රාඥයින්ට ඇතිවන බලයකි.
රාජයෝග බලයක්එමෙන්ම එවැන්නක් ඇතිවීම රාජයෝග බලයක් ද වේ. සිදුවන විවාහයක සාර්ථක බව හෝ අසාර්ථක බව සිදුවන්නේ තම කේන්දරයේ පිහිටි ග්‍රහයන්ගේ සුබ අසුබතාව අනුව බව පෙන්වා දී ඇත. තවද, කේන්දරයක ශනි මංගල යෝගය ද විවාහයට අසුබ පල ගෙන දෙන පිහිටීමක් වෙයි. කොතෙක් මංගල යෝජනා ලැබුණත් විවාහය ප්‍රමාදවීම නිසා ඔවුනොවුන් මහත් කලකිරීමට පත්ව සිටියි. එමෙන්ම මානසික පීඩනයෙන් ද පසුවන අතර ඊර්ෂියාව, ක්‍රෝධය වගේම කේන්තියෙන් ද පසුවේ.මෙවැනි තත්ත්වයට පත්ව සිටින යෞවන යෞවනියන් තරහ මරහ, කේන්තිය හැකිතාක් සමනයකට පත්කරගත යුතුය. පත්තිනි දෙවියන්ට භාරවී තම දුක් ගැනවිල්ල කිව යුතුය. කේන්දරය ජ්‍යොතිෂ ශාස්ත්‍රඥයකුට පෙන්වා ඔහු දෙන ලද උපදෙස් මත කටයුතු කළ යුතුය. බෝධි පූජා, ග්‍රහ පූජා, සෙත් ශාන්ති කරවා මෛත්‍රී සිතින් කටයුතු කළ යුතුය. එවිට තම බලාපොරොත්තු සපල වේ. කේන්දරයක දෝෂ ඇතැයි කියමින්, විවාහ හරියන්නේ නැතැයි කියමින් සිත් තැවුලෙන් නොසිටිය යුතුය. තම සිතැඟි ඉටුවේවායි යන බලාපොරොත්තුව ඇතිකරගෙන බෝධිපූජා, දේව පූජා තැබීමට යොමුවිය යුතුය.උපුටා ගැනීම දිනමිණ
