කේන්දරේ බලලා අමනුෂ්‍ය දෝෂ ගැන කියන්න පුළුවන්ද?
ඔබේ දියුණුව අඩාල කරන අමනුෂ්‍ය දෝෂ අප ජීවත්වන වටපිටාවේ, භූමියේ, නිවෙසේ, ව්‍යාපාරික ස්ථානයේ බොහෝවිට පැවැතිය හැකිය. වාස්තු දෝෂ වැනි දෝෂ ඇසට පෙනුනත් භූත, පෙරේත, යක්ෂ, බහිරව වැනි දෝෂ අපට ඇසට නොපෙනේ. යමෙකුට අසනීප, ලෙඩදුක් නොයෙක් ආකාරයේ කරදර ඇතිවිය හැකිය. බොහෝ දුරට යම් අයකුට මෙවැනි අමනුෂ්‍ය දෝෂ බලපාන්නේ දැයි සොයා ගත හැකි එකම ක්‍රමයක් වන්නේ ඔහුගේ ජන්ම පත්‍රයයි.
මේ පිළිබඳව අපේ පුරාණ නක්ෂත්‍ර ඇදුරෝ දැන සිටියහ. පුරාණයේ අසනීප, ලෙඩ දුක් අතපය කැඩීම්, බිඳීම් ආදියට වෙද මහතා ළඟට යනවා. ජන්ම පත්‍රය රැගෙන එන්න කියන්නේ ඔහුට වැලඳී ඇති අසනීපය අමනුෂ්‍ය දෝෂයක් නිසා ඇති වූවක්ද එසේත් නොමැතිව සාමාන්‍ය ලෙඩක්ද කියා සොයා ගැනීමටය. මේ අනුව විමසා බැලීමේදී යම් අයෙක් මෙලොවට ජනිත වන අවස්ථාවේ අහසේ උදා වූ ග්‍රහ තාරකාවන්ගේ ශුභ හෝ අශුභ කිරණ ශක්තීන් මුල් වී මිනිසාට දුක, කඳුළ, වේදනාව අභාග්‍ය ගෙන දෙන කාරණා ඇති වීමත් එමෙන්ම ලාභය, වාසිය, ඉතිරිය, නීරෝගි බව, වාසනාව ගෙන, දෙන කාරණා ගෙනදීමත් සිදුවන බව ජන්ම පත්‍රයෙන් නිගමනය කළ හැකිය. ජේ‍යාතිෂ විද්‍යාවට අනුව කරුණු විමසීමේදී,
ඕනෑම අයෙක් උපත ලබන විට අස්විද නැකැතින් ආරම්භ වන නැකැත් 27න් එක් නැකැතකට අයත් වේ. එම නැකැත නවග්‍රහ මණ්ඩලයේ රවි, සඳු, කුජ යන ග්‍රහයකුට අයත් වේ. රාහු, කේතු යන ඡායා ග්‍රහ දෙපොළ නැකැත් අධිපතියන් දුර්වල කිරීමට කේන්දරයක 04, 08, 12 යන ස්ථානවලදී මුල් තැන ගනී. සෙනසුරුද මේ හා සමාන වුවත් සෙනසුරුට සංයෝග වන ග්‍රහයා හෝ දෘෂ්ටිය ලබන ග්‍රහයා බලවත් සාම්‍යමිත්‍ර ග්‍රහයකු නම් යහපත් වේ.
රාහුගෙන් හෝ සෙනසුරුගෙන් දෘෂ්ටිය ලබයි නම් හෝ සංයෝග වූයේ නම් එම ජන්මියා බොහෝ අවස්ථාවලදී දුබල මානසික තත්ත්වයක් ඇති අසනීප ලෙඩ දුක්වලින් පිරි අයකි. රාහු, කේතු, සෙනුසුරු මහ දසා කාලවලදී සම්පූර්ණයෙන්ම කටුක අමිහිරි අසනීප ලෙඩ රෝග, බිඳවැටීම් ඇති කරයි. සඳු, බුධ දසා කාලවලදීද මෙම ග්‍රහයන්ගේ දෘෂ්ටියට හසු වීමෙන් අසනීප, නඩු – හබ, විවාහ අවුල් වැනි අවුල්වලට ගොදුරු කරයි. මේ කාල සීමාව පෙරේත දෝෂ, අමනුෂ්‍ය දෝෂ, අන වින දෝෂ ඇතිකරන කාලයකි. දියුණුව අඩාළ කර ණය බරට පත් කරයි.
රාහු, කේතු ඡායා ග්‍රහ දේපොළ ස්ථාන භූමිවල බහිරව දෝෂ ඇති කිරීමට බලපාන ග්‍රහ දෙපොළකි. කේන්දරයේ 04, 08, 012 යන භාවවල්ද ගෝචර අවස්ථාවලදී ඉතා තදින්ම අමනුෂ්‍ය දෝෂ ඇති කරයි. අද සා, සියාවස රාහුට අයත් මෙම නැකැතකින් උපත ලබා රාහු ඉහත කී භාවයක යෙදුණේ නම් පදිංචි ස්ථානයේ බහිරව දෝෂයක් ස්ථිර ලෙසම පවතී. මේ නිසා ඉඩම් ආරවුල් නඩු – හඬ, රණ්ඩු, ලේ වැගිරීම්, පවුලේ අය අතර කෝලහාල, අනියම්
සබඳතා, මත්පැනට සුරාවට ගොදුරු කිරීම් ඇතිකරයි. කේතුට අයත් අස්විද මා, මුල නැකැතකින් උපත ලබා කේතු 04, 08, 12 යන ස්ථානයක යෙදුනේ නම් මළ යක්ෂ, මළ පෙරේත යන අමනුෂ්‍යය බන්ධනය ලද හූනියම් දෝෂ හටගෙන බිරිය, ස්වාමියා අනාචාර හැසිරීම්, ස්වාමියා සුරාව ගොදුරු කර ගැනීම වැනි අවුල් ඇති කරයි.
අස්විද නැකැතේ 01-02-03-04 යන එක් එක් පාදයකින් උපත ලබා මේෂ ලග්නය හිමිව කේතු 08 හෝ 12 වැන්නේ 04 වැන්නේ යෙදුන ජන්මියාට මළගිය ඥාති පෙරේත දෝෂ හටගනී. කේන්දරයේ ශුභ ග්‍රහ තත්ත්වයක් ඇතිව මෙම ඉහත ආකාරය යෙදීමෙන් ඥාති පෙරේත දෝෂ හටගෙන ශාස්ත්‍ර කීම, ගුප්ත කර්ම හෝ වෙනත් ඒ සම්බන්ධ වැඩවලින් මුදල් උපයාගත හැකි වටපිටාව ගොඩනැඟේ. නමුත් ධනය නොරැඳේ.
මා නැකැතේ 01, 02, 03, 04 යන එක් පාදයකින් උපත ලබා සිංහ ලග්නය. හිමි ජන්මියාගේ කේතු 04, 08, 12 යන ස්ථානයක පිහිටියේ නම් මියගිය ඥාතීන් අමනුෂ්‍ය ආත්ම ලබා නිවසට, භූමියට, ව්‍යාපාරයට අරක් ගෙන දියුණුව අඩාළ කර බොහෝ කරදර පීඩා ඇති කරයි. කේන්දරයේ 04-08-12 යන භාවයත් වෘශ්චික, මීන, කටක, මේෂ යන භාවයක් වී කේතු උච්ච බලයෙන් වුවහොත් පැමිණෙන භූත පෙරේත දෝෂ ඉතා බලවත්ය. එම දශා කාලවලදී සියලු දේ විනාශ වේ. ඕනෑම ලග්නයක් වී එහි 04, 08, 12 භාවයක කේතු නීච සතුරු වී යමෙකු උපත ලද හොත් නිවස භූමිය කසළ ගොඩක් බවට පත් කරන බලවත් පෙරේත දෝෂ ගෙන දේ. ගෙවල් භූමි කොතෙක් පවිත්‍ර කළත් නැවැත අපවිත්‍ර වේ. සුරාවට, සූදුවට, මත්ද්‍රව්‍යවලට ලොල් කරවන පෙරේත දෝෂයකි. නිවාස ගඳගස්වයි. දුර්ගන්ධය ඇති කරයි.
බල හීන අව සඳු සමඟ සංයෝගව කේතු කේන්දරයේ 04, 08, 12 හෝ ලග්නයේ යෙදීම උපතින්ම එම ජන්මියාටද නීච භූත පෙරේත ආත්මවල බලපෑම ඇති කරයි. බොහෝ විට දේවාල ආදී ගුප්ත කටයුතුවලටද යොමු කරවයි. මේ ආකාරයට යමකුගේ ජන්ම පත්‍රය. ගැඹුරින් අධ්‍යනය කිරීමෙන් නිවසට, පදිංචි ස්ථානයට අදෘශ්‍ය බලපෑම්, අමනුෂ්‍ය දෝෂ හඳුනාගෙන පිළියම් යෙදීමෙන් දියුණුව ජයග්‍රහණය උදා කරගත හැකිය.
උපුටා ගැනීම මව්බිම
