භූමි දෝෂ සහ ශෛල්‍ය දෝෂයන් ඉවත් කර නිවාස ඉදිකරමු
බොහෝ දෙනකු හිතන දෙයක් තමා වාස්තු දෝෂ කියන්නේ, තමන් පදිංචිවෙලා එහෙම නැතිනම් පදිංචි වෙන්න බලාපොරොත්තුවෙන් ඉදිකරන නිවසේ පවතින දෙයක් පමණයක්ය කියලා. සමහර වාස්තුවේදීන්ට පවා අමතක වෙන දෙයක් තමයි නිවසකට ගිහින් එම නිවස පිහිටි භූමිය, භූමියේ හැඩය, වැසි ජලය බැසයෑම ආදිය සම්බන්ධයෙන් පරීක්ෂාවට ලක්කිරීම. භූමිය සම්බන්ධයෙන් පරීක්ෂාවක් නොකර නිවස පමණක් පරීක්ෂාවට ලක්කරලා එම නිවසේ පවතින වාස්තු දෝෂ කොතරම් නිදොස් කළත් භූමියේ පවතින දෝෂය නිසා ප්‍රතිඵලයක් ගන්න නොහැකි වෙනවා. ඒක හරියට අර කියමනක් තියෙන්නේ, හොඳට හෝදලා මඩට විසි කළා වගේ කියලා. ඒකෙන් වෙන්නේ යළි මඩ තැවරීම පමණයි. මම මේ ගැන ලියන්නේ.
පසුගියදා මා නිවාසයක් පරීක්ෂාවේදී ලත් අත්දැකීමක් තුළින්. එනම් දකුණු ප්‍රදේශයේ එක්තරා නිවසක් මා පරීක්ෂාවට සහභාගි වුණා. මෙයට පෙර එම නිවස කීපදෙනකු විසින් පරීක්ෂාවට ලක්කර පැවතුණු ස්ථානයක්. නිවසේ ලොකු වාස්තු දෝෂ පැවතුණේ නෑ. ඒවා නිදොස් වෙලා තිබුණා. නමුත් මේ අයගේ ලොකු බලාපොරොත්තුවක් තිබිලා තියෙනවා තමන්ගේ එකම දියණියගේ විවාහය ප්‍රමාදවීම සම්බන්ධයෙන් බොහෝ දෙනකු දියණියගේ අත ගැනීමට අපේක්ෂාවෙන් පැමිණිය ද මඟුල තීන්දු කරගෙන ගිය ද දින කීපයකින් ආපු කිසිම අයකුගෙන් පිළිතුරක් ලැබිලා නෑ. මෙම දියණිය ද රූප ශෝබාවෙන් උගත්කමින් හා විශාල දායාදයකට හිමිකාරිනියක්. පසුව භූමිය පරීක්ෂා කිරීමේදී එම භූමිය තරමක් විශාල මධ්‍ය පහත් වුණ ත්‍රිකෝණ හැඩති භූමියක්. මෙවැනි භූමිවල වෙසෙන නිවැසියන්ගේ දූ දරුවන්ගේ විවාහ කටයුතුවලට බාධා පැමිණේ. පොරව තලයක හැඩ ගන්නා ව්‍යංජන භූමිය හා නිසි පිළිවෙළට නොමැති මායිම් දික්වීම් කෙටිවීම් ඇති භූමි හෙවත් විෂම භූමි ද මේ හා සමාන ඵල දෙන භූමි බව සඳහන් වේ. මා විසින් පරීක්ෂා කළ බැලූ එම භූමියේ තිබූ ඝෝෂා තත්ත්වයන් දින කීපයකින් පිළිසකර කර නිවැරදි කළ අතර පසු දිනක ඔවුන්ගෙන් දුරකථන ඇමතුමක් මා හට ලැබුණේ එම දියණියට මංගල්‍යයක් නිශ්චිත ආකාරයටම තීන්දු කර දින නියම කරගත් බවයි. සමහර භූමි තියෙනවා, තමන්ට මොනම දේ කළත් දියුණුවක් ලබාගන්න අමාරුයි. බලාපොරොත්තු බිඳවැටෙනවා. දරුවන්ටත් කොතරම් මහන්සියෙන් ඉගැන්වීම් කළත් අපේක්ෂිත ප්‍රතිඵල ලබාගන්න බෑ. රැකියාව වුණත් එහෙමයි.
රැකියාවලට සම්මුඛ පරීක්ෂණවලට සහභාගි වුණාට එක්කෝ රැකියාව ලැබෙන්නේ නෑ. නැතිනම් නොගැළපෙන ආකාරයේ රැකියාවක් තමයි ලැබෙන්නේ. කොටින්ම කියනවා නම් අතට ගත් දේ කටට දමාගන්න පින නැති මෙවැනි භූමි L හැඩය ගත් භූමි සමහරු මේකට පොරවක හැඩය ගත් භූමි කියලත් කියනවා. පොරව තලයක හැඩය ගත් භූමිය ව්‍යංජන භූමියක්. මිට ගහපු පොරවක හැඩගත් භූමිය තවත් එකක්. කොහොම වුණත් වාස්තු විද්‍යාවට අනුව මෙම භූමි දෙකම හොඳ නෑ.
මෙම භූමි සම්බන්ධයෙන් වාස්තු රතනාවලියේ මෙහෙම සඳහන් වෙනවා. පිපිරීම්, පැළීම් සහිත භූමි, ශල්‍ය ඇති භූමි, තුඹස් සහිත භූමි, භූමියේ පහත්වීම් උස්වීම්වලට ලක්ව ඇති භූමි හෙවත් විෂම භූමි පදිංචියට නුසුදුසු බව. ඒ භූමිවල පදිංචි වීමෙන් ආයුෂ, ධනය නැසෙන බව ප්‍රකාශ වේ. පිපිරීම් සහිත බිම ගෘහයක් තනා විසීමෙන් ගෘහ හිමියාගේ මරණය සිදුවේ. වෘක්ෂලතා නොවැටෙන බිමේ, කරමැටි පිහිටි බිමේ ධනය විනාශවීම ද ශල්‍ය දෝෂ සහිත බිමේ සිත් තැවුල් කරදර ද විෂම භූමියේ ශත්‍රැ වෘද්ධිය ද වේ.
දකුණ – බටහිර – නිරිත – වයඹ දිශා උස්ව පිහිටි භූමිවල වැසි ජලය ගලා බහින්නේ ද මෙම දිශාවන්ට නොව උතුරු – ඊශාන – නැඟෙනහිර දිශාවන්ටයි. මෙම පිහිටීම ඉතාම ශුභ ඵල ගෙන දේ. ගජ පෘෂ්ඨ වශයෙන් ඉහත භූමි නම් කෙරේ. ශ්‍රීමත් වේ. ධනයෙන් පරිපූර්ණ වේ. කීර්තිය, යසස අත්වේ. ආයුෂ වර්ධනය වේ. කූර්ම පෘෂ්ඨ භූමි හෙවත් මධ්‍ය උස්ව පිහිටි ඉදිබුවෙක් ආකාරයට පිහිටි භූමිය ද නැඟෙනහිර දිශාව – ගිනිකොන දිශාව – ඊශාන දිශාව උස්වී බටහිර පහත්වීම (අසුර පිටක් ලෙසින්) නිසා මෙම භූමියේ පිහිටි නිවසට ශ්‍රියා කාන්තාව නොපැමිණේ. ධනය හානි වීමද පුත්‍ර හානි, සිව්පා හානි ද ගෙදර සාමාජිකයන් කොපමණ භක්තිමත්ව ජීවත්වුණ ද ඔවුනට දෙවියන්ගේ පවා ආශිර්වාදය හිමි නොවනු ඇත. මෙම භූමිය දෛත්‍ය පෘෂ්ඨ ලක්ෂණ භූමි ලෙස හඳුන්වයි.
යම් භූමියක නැඟෙනහිර – බටහිර දිශා දීඝ වී උතුර – දකුණ දිශා උස්වේ ද එම බිම නාග පෘෂ්ඨයයි හඳුන්වයි. මෙහි වාසය නිසැකයෙන්ම මරණය බවද භාර්යාවට හානි, පුත්‍ර හානි, ශත්‍රැ වෘද්ධිය, පියවරෙන් පියවරට පැමිණේ. පුරාතනයේ පටන් නිවසක් ඉදිකිරීමට ප්‍රථම භූමිය පරීක්ෂා කර ගැනීමක් සිදු කරනු ලබයි. භූමියේ ඇති මනුෂ්‍ය ඇසට පෙනෙන දෝෂයන්වල පවතින දෝෂ ඉහත ආකාරයේ බොහෝ දේ දැකබලා ඒවාට පිළියම් යොදාගෙන නිවස ඉදිකිරීම කළ හැකිය. උදාහරණ වශයෙන් භූමියේ උතුර උස්ව පැවතීම සිදුව ඇත්නම් උතුරෙන් පහත් කර දකුණ ගොඩකර ගත හැක. නමුත් නොපෙනෙන දෝෂයන් වශයෙන් හඳුන්වන්නේ භූමියේ පවතින මියගිය ඥාතීන්ගේ ඇල්ම බැල්ම එම භූමියට පැවතීම, අමනුෂ්‍ය දෝෂයන් බලවත් වීම යනු කරුණු කාරණයි. එලෙසම මෙම භූමිවල මෙයට වසර සිය ගණනකට පෙරාතුව පොළවට යටවී ඇති වැළලී ඇති සමහර සත්ත්ව හා මනුෂ්‍ය ඇට කැබලි ද ඕනේම භූමියක පවතී. එය සාමාන්‍ය දෙයක් වේ. නමුත් මෙලෙස පවතින ශෛල්‍ය සමහර භූමිවල අදටත් සක්‍රීයව පවතී. එලෙස යම් භූමියක ශෛල්‍ය සක්‍රීයව පවතින්නේ නම් එය විමසා බලා එයට අවශ්‍ය ප්‍රතිකර්ම කිරීමේ හැකියාව වාස්තු විද්‍යාත්මකව පවතී. එනම් එවැනි ශෛල්‍යවල සක්‍රීය හෝ අක්‍රීය බව භූමි පරීක්ෂාවකදී ශෛල්‍ය චක්‍රය භාවිතයෙන් බලාගැනීමට හැකිවනු ඇත.
ප්‍රථමයෙන්ම නිවස ඉදිකරන භූමියට එම භූමියේ හිමිකරු හෙවත් නිවසක් තැනීමට බලාපොරොත්තු වන සේවාදායකයා සමග පිවිස, ඔහුව භූමියේ ගිනි කතුරු පිහිටි ස්ථානයේ නවතා ඔහුගේ ඉෂ්ට දේවතාවන් සිහි කිරීමට ඊශාන දිශාව බලන්න උපදෙස් දිය යුතුය. තමන්ගේ ඉෂ්ට දෙවියන් වගේම මෙම භූමියට යම් ඥාති බලවේගයන්ගේ බැල්මක් පවතී නම් ඒ අය ද සිහි කර විෂ්ණු, කතරගම, ගම්භාර දෙවිවරුන්ගෙන් අවසර ගත යුතුයි. ඉන්පසු ගෘහය ඉදිකිරීමට බලාපොරොත්තු වන තම සේවා දායකයාට තෙවරක් දක්ෂිණ වෘතව කැරකීමට උපදෙස් දී තමන්ට කැමති දිශාවකට ගමන් කිරීමට උපදෙස් ලබාදී 10 න් පහළ සංඛ්‍යාවක් ප්‍රකාශ කිරීමට කිව යුතුයි. ඔහු විසින් ප්‍රකාශ කළේ ඉරට්ටේ සංඛ්‍යාවක් හා ගමන් කළේ ගිනිකොන දිශාවට නම් එම භූමියේ නිසැකවම ශෛල්‍ය දෝෂ පවතී. ඒ වගේම ගමන් කළේ නිරිත දිශාවට නම් හා ප්‍රකාශ කළේ ඔත්තේ සංඛ්‍යාවක් නම් මෙම භූමිය ඉතාමත් ශුභදායකය. නිවසක් කිසිම බාධාවකින් තොරව ඉදිකර වසර 1 1/2 තුළ පදිංචිවීමේ වාසනාව පවතී. නමුත් ඉරට්ටේ සංඛ්‍යාවක් ප්‍රකාශ කර තිබෙන අවස්ථාවක එම භූමිය තුළ පවතින ශෛල්‍ය සක්‍රීය නිසා නිවාස ඉදිකිරීම පටන් ගත් මොහොතේ සිට නොයෙක් බාධා පීඩා ඇතිවී සමහර විට වසර ගණනාවක් නිවසේ ඉදිකිරීම් ඇදෙමින් පවතිනු ඇත. මෙම ශෛල්‍ය චක්‍රය ක්‍රියාකර භූමියේ නොපෙනෙන දෝෂ බලාගැනීමට හැකියාව නිවැරදිව පවතින අතර මා විසින් මෙම ක්‍රමය බොහෝ නිවාස ඉදිකිරීමට බලාපොරොත්තු වන ස්ථානවල සිදු කර ප්‍රායෝගිකවම එහි සත්‍ය අසත්‍ය බව පරීක්ෂා කර ඇත. මෙය ඉතා නිවැරදි අතර එවැනි ශෛල්‍ය දෝෂ පවතින භූමි සඳහාම භාවිතා කරන කෙම් ක්‍රම භාවිතා කරමින් අශුභ ශක්තීන් පලවා හැර ශුභ ශක්තීන් භූමියට ඇදගැනීමේ සාර්ථක ක්‍රම පවතින බවද කිව යුතුය. මෙහිදී නිරිත වගේම ඊශාන දිශාවට ගමන් කිරීම ද ඉතා ශුභ වේ.
දේශබන්ධු, දේශමාන්‍ය, විශ්වශක්ති
වාස්තු විද්‍යා විශාරද, ඩබ්. කේ. ඒ. එම්. චන්ද්‍රසිරි,
සෙන්දිරියාමුල්ල – සඳලංකාව.
0777856649.
උපුටා ගැනීම දිවයින
