ආදරය කරුණාව – ඉවසීම නැති කරන වාස්තු දෝෂ
වාස්තු නිවැරදි කිරීමකින් පසුව බොහෝමයක් පිරිසක් සතුට දනවන ප්‍රතිචාර දක්වන අතර එහෙත් සුළු පිරිසක් “වාස්තු බැලුවට අපට නම් වැඩක් වුණේ නැහැ” යි වැනි ප්‍රතිචාර දක්වන අවස්ථාද සමාජයේ ඉඳහිට අපට අසන්නට ලැබේ. එය එසේ වන්නේ කෙසේද? මේ සඳහා පිළිතුරු සෙවීමට ප්‍රථම මුලින්ම අප වාස්තු ශාස්ත්‍රය පිළිබඳව යම් අවබෝධයක් ලබාගත යුතුවේ. එය නිවැරදි වාස්තු පරීක්ෂාවක් සඳහා මෙන්ම වාස්තු නිවැරදි කිරීමෙන් පසු යහපත් ඉක්මන් ප්‍රතිඵල සඳහා මහඟු පිටිවහලක් වේ. වාස්තු ශාස්ත්‍රය ගෙවල් කඩන හෝ මිනිසුන් බිය කරන ශාස්ත්‍රයක් නොවේ. එය ස්වාභාවික ශක්තීන් අපගේ යහපත් පැවැත්ම වෙනුවෙන් යොදාගත හැකි ක්‍රමවේදයකි. මේ පිළිබඳව යම් අවබෝධයක් තබාගෙන නූතන ඉදිකිරීම් ක්ෂේත්‍රය සම්බන්ධව අවධානයක් යොමු කළ විට අපට පෙනෙන කාරණයක් වන්නේ
සම්ප්‍රදායක නිවාසකරණයෙන් මිදී විවිධ හැඩතල යොදා ගනිමින් අලංකාරය මුල්තැන කරගෙන නිවාස ඉදිකරන රැල්ලක් ආරම්භ වී ඇති බවයි. එම නිසා නිවාස ඉදිකිරීමේදී නිවෙසේ කොටස් අඩු කරමින්, එකතු කරමින් විවිධ හැඩතල යොදාගනිමින් නිවාස නිර්මාණය වේ. නමුත් වාස්තු සිද්ධාන්තයන් පරයා අලංකාරය පමණක් ගැන සිතා කටයුතු කිරීමෙන් නිවැසියන්ට පසුකාලීනව දුර්විපාකයන්ට මුහුණදීමට සිදුවේ. එසේම එවැනි හැඩතල යෙදූ නිවෙසක වාස්තු පරීක්ෂාවකදී මධ්‍ය ලක්ෂ්‍යය සෙවීමේදී නිවෙසට පරිබාහිරව පවතින මිදුලේ කොටස්ද එකතු කරගනිමින් මන:කල්පිත ලෙස නිවෙස හතරැස් කරමින් සාවද්‍ය ලෙස සිදු කරන ගණනය
කිරීම් නිසා නිවැරැදි මධ්‍ය වෙනුවට වෙනත් ස්ථානයක් සලකා කටයුතු කිරීමෙන් වාස්තු දෝෂ සම්බන්ධව වැරැදි තීරණවලට යොමු වේ. එවිට දෝෂයන් සඳහා කරන පිළියම් ප්‍රතිඵල රහිත වනු ඇත. එම නිසා විශේෂයෙන් එවැනි නිවෙසක මධ්‍ය සෙවීම සඳහා නිවෙසේ බාහිර බිත්ති ඔස්සේ නිවෙසේ සැලසුම කපා තනා ගන්නා පතොරම තැන් කිහිපයක් ඇල්පෙනෙති වැනි තුඩකින් එල්ලා ඒ හරහා යන සිරස් රේඛා ඇඳ එහි එකිනෙක කැපී යන තැන සෙවීමෙන් නිවැරදි මධ්‍ය සොයා ගත යුතුය. එසේත් නැති නම් පරිගණක මෘදුකාංගයක් භාවිත කරමින් ඉතාමත් නිවැරැදි මධ්‍ය සොයා ගත හැකිය. මෙහිදී විශේෂයෙන් සැලකිය යුතු කාරණය වන්නේ ගෘහ පිණ්ඩනය හෙවත් මධ්‍ය ලක්ෂ්‍යය ගණනය කිරීම සඳහා යොදා ගන්නා වපසරිය සඳහා අත්තිවාරම, බිත්ති පියස්ස හෙවත් වහලය තිබිය යුතු බව.
එසේම වාස්තු දෝෂ හඳුනා ගැනීමෙන් පසුව දෝෂ නිවාරණය සඳහා ප්‍රමුඛතා ලේඛනයක් සකසා කටයුතු කළ යුතුය. මෙහිදී විශේෂයෙන් සක්‍රිය හෙවත් මූලික දෝෂ සඳහා පළමුව පිළියම් යොදා ගත යුතුය. එසේ නැති නම් උදාහරණයක් ලෙස හෘද්‍යයාබාධ පුද්ගලයකුට පළමුව කකුලේ සීරීමකට ප්‍රතිකාර කළා වැනි ප්‍රතිඵල ලැබෙන බව දත යුතුය. වාස්තු ශාස්ත්‍රය තුළ දෝෂයන් හයසියයට වඩා ප්‍රමාණයක් හඳුනා ගත හැකි අතර එයින් සියයක පමණ ප්‍රමාණයක් මූලික දෝෂ හෙවත් සක්‍රිය දෝෂ වේ. මුළුතැන්ගෙය, වැසිකිළි වළ, වැසිකිළිය ආදිය ඊශාන දිශාවේ පිහිටා තිබීම වැනි දෝෂයන් සක්‍රිය දෝෂයන්ට උදාහරණයකි. එම නිසා දෝෂවලට පිළියම් කිරීමේදී මේ ගැන අවබෝධයෙන් කටයුතු කිරීමෙන් දැනෙන ඉක්මන් ප්‍රතිඵල ලබා ගත හැකි වේ.
තවද යහපත් ප්‍රතිඵල සඳහා වාස්තු ශාස්ත්‍රය අප නිවෙසක් තුළ හැසිරිය යුතු ආකාරය, පිළිවෙළ, පිරිසුදු බව, ක්‍රමවත් භාවය, ඒ වගේම චර්යාවන් යහපත් ලෙස සකසා ගැනීම ආදී වූ ලෞකික සහ ආධ්‍යාත්මික දියුණුව වෙනුවෙන් ක්‍රමවේදයන් හඳුන්වා දී ඇත. එම නිසා භෞතිකව හෝ ශක්තිමය ආකාරයට නිවෙසට සිදුකරන වෙනස්කමකට පමණක් සීමා නොවී කටයුතු කළ යුතුය. නිවෙසක පිරිසුදුව පිළිවෙළට තබා ගැනීම වැනි දේ අමුතුවෙන් අප පැහැදිලි කළ යුතු නැත. ඒ ගැන ප්‍රාථමික පාසල් අවධියේ සිට අපට අවබෝධය ලබා දෙන්නකි. නමුත් බොහෝ නිවැසියන්ට එම තත්ත්වයන් අමතක වූ බවක් පෙනේ. නමුත් අප අරමුණු සඳහා නැවත ඒ පිළිබඳව අවධානය යොමු කළ යුතුය. පිරිසුදු වාතය සහ සූර්යාලෝකය නිවෙසක සක්‍රියත්වයට අත්‍යවශ්‍ය කාරණයකි. එම නිසා හැකි සෑම අවස්ථාවකදීම ෙදාර ජනෙල් විවෘතව තබා ගැනීම සිදුකළ හැකිය. එසේම විශේෂයෙන් නිදන කාමර තුළ අනවශ්‍ය ආකාරයට ගෘහ භාණ්ඩ තබා නොගත යුතුය. විශේෂයෙන් ඇඳන් යට නිදහස්ව තබා ගත යුතුය. සුවබර නින්දකට එවිට අවකාශ ලැබෙනු ඇත. මුළුතැන්ගෙයින් ඉවත් කරන කුණු කසළ දුර්ගන්ධය හමන තෙක් නිවෙස තුළය. සමහර කාමර පිරී තිබෙන්නේ භාවිතයෙන් ඉවත් කරන ලද විදුලි උපකරණවලිනි. එසේත් නැතිනම් ප්‍රයෝජනයට නොගන්නා අබලි ද්‍රව්‍ය වේ. සමහර නිවෙස්වල ජනෙල් ඇරෙන්නේම නැති තරම්ය. අඳුර රජයන නිවාසද නැතුවාම නොවේ. යහපත් ප්‍රතිඵල උදෙසා මේ සම්බන්ධවද අප අවධානය යොමු කළ යුතුය.
එසේම අප අමතක නොකළ යුතු කාරණයක් වන්නේ අප සියල්ලන්ගේම භෞතික ශරීරය වටා පියවි ඇසට නොපෙනෙන ශක්ති ශරීරය නමින් හඳුන්වන ශරීරයේම හැඩය ගන්නා විද්‍යුත් චුම්භක ක්ෂේත්‍රයක් පවතින බවය. එය ප්‍රභාමණ්ඩලය හෙවත් ඕරා යන නමින් හඳුන්වනු ලැබේ. මෙම ප්‍රභාමණ්ඩලයේ බලවත්කම මත ඕනෑම පුද්ගලයකුගේ ලෞකික සහ ආධ්‍යාත්මික දියුණුව ර¼දා පවතී. ප්‍රභාමණ්ඩලයේ බලවත්කම පුද්ගලයාගෙන් පුද්ගලයාට වෙනස් වේ. එය සඳහා පුද්ගලයා ජීවත් වන පරිසරය ප්‍රධාන ලෙස බලපෑම් කරන බැවින් වාස්තු දෝෂ රහිත නිවෙසක ජීවත් වීම නිසා ශක්ති ශරීරය බලවත් වන අතරම වාස්තු දෝෂ සහිත නිවෙසක ජීවත්
වීමෙන් ශක්ති ශරීරය දුර්වල වේ. ඒ වගේම ඒ හා සමව පුද්ගලයකුගේ සිතුවිලි සෘජුවම ශක්ති ශරීරයේ බලවත්කමට බලපෑම් කරන බැවින් කේ‍රා්ධය, ඊර්ෂ්‍යාව, වෛර සිතුවිලි, අලස බව පළිගැනීම වැනි අයහපත් සිතුවිලි අනුව ප්‍රභාමණ්ඩලය අඳුරු පැහැගැන්වී හැකිළෙන අතර මෛත්‍රිය, කරුණාව, ආදරය, ඉවසීම, තැන්පත්කම වැනි යහපත් සිතුවිලි අනුව ආධ්‍යාත්මික වශයෙන් භාවනා වැනි කටයුතුවලින් ප්‍රභාමණ්ඩලය පැහැපත් සහ බලවත් වේ.
කරුණු එසේ වේ නම් අපගේ අවශ්‍යතාව යහපත් ජීවිතයක් ගත කිරීම නම් ප්‍රභාමණ්ඩලය යහපත් ලෙස පවත්වා ගත යුතුය. ඒ සඳහා පදිංචි නිවෙසේ වාස්තු දෝෂ ඇත්නම් දෝෂ නිවාරණය සඳහා නිසි පිළියම් යෙදිය යුතුය. වාස්තු නිවැරැදි කිරීමෙන් පසු ලැබෙන වාස්තු උපදෙස් නිසි පරිදි ක්‍රියාත්මක කළ යුතුය. එසේ නොවන කල්හි වාස්තු නිවැරැදි කිරීමෙන් බලාපොරොත්තු වූ යහපත් ප්‍රතිඵල ලැබෙන්නේ නැත. එසේත් නැති නම් ප්‍රතිඵල ප්‍රමාද වේ.
උපුටා ගැනීම මව්බිම
