භික්ෂු සරසවියේ ජ්‍යෙෂ්ඨයන් පිරිසකගෙන් හිමිනමකට ගුටි පූජාවක්
මාස දෙකකට පමණ ඉහතදී අනුරාධපුර භික්ෂු විශ්වවිද්‍යාලයේ පැවති අරගලය පාවා දුන් බවට චෝදනා කරමින් එම විශ්වවිද්‍යාලයේ ම ජ්‍යෙෂ්ඨ භික්ෂුන් වහන්සේ පිරිසක් එක්ව කනිෂ්ඨ භික්ෂුන් වහන්සේ නමකට පහර දී ඇති බව ත් උන්වහන්සේ දැනට අනුරාධපුර ශික්ෂණ රෝහලේ ප්‍රතිකාර ලබන බව අනුරාධපුර පොලිසිය පවසයි.
මෙලෙස පහර කෑමට ලක්ව තුවාල ලබා ඇත්තේ, අනුරාධපුර ශ්‍රී ලංකා භික්ෂු විශ්වවිද්‍යාලයේ තුන්වන වසර ඉගෙනුම ලබන විසිපස් හැවිරිදි (25) හිමිනමකි.
ශ්‍රී ලංකා භික්ෂු විශ්වවිද්‍යාලයේ සිව්වන වසරේ ඉගෙනුම ලබන හන්තාන, උමුන්පිටිය, ඇතිවිට, බෝදාගම සහ මිහින්තලේ යන ප්‍රදේශවල පදිංචි ශිෂ්‍ය භික්ෂුන් වහන්සේලා පිරිසකගේ පහර කෑමට ලක් වූ මෙම ශිෂ්‍ය භික්ෂුන් වහන්සේ ඊයේ සවස වන විටත් අනුරාධපුර ශික්ෂණ රෝහලේ 11 වන වාට්ටුවේ ප්‍රතිකාර ලබමින් සිටියහ.
පහර කෑමට ලක් වූ ස්වාමීන් වහන්සේ විසින් විශ්වවිද්‍යාලයේ පැවති අරගලය පාවා දුන් බවට චෝදනා කරමින් මෙම ශිෂ්‍ය භික්ෂුන් වහන්සේ පිරිස එක්ව අතින් පයින් පහර දුන් බවට තුවාල ලැබූ භික්ෂුන් වහන්සේ විසින් අනුරාධපුර පොලිසිය වෙත ප්‍රකාශයක් ලබා දී තිබේ.
අනුරාධපුර මූලස්ථාන පොලිසිය මෙම සිදුවීම සම්බන්ධයෙන් වැඩිදුර පරීක්ෂණ පවත්වනු ලබයි.
05/05/2025
