ලග්නය කටක නම් සිකුරාදා ලොතරැයියක් අරන් බලන්න

වර්තමාන කාලයේ මිනිසුන්ට ආර්ථික අමාරුකම් බොහෝ සේ පවතී. මේ නිසාම කුමක් හෝ ක්‍රමයකින් තමන්ට ධනයක් ලැබේ නම් අපි කාටත් එය සතුටකි. යම්කිසි ජන්ම පත්‍රයක ධන යෝග කුමන ක්‍රමයකින් හෝ දියුණුවක් ලැබෙන බව කේන්දරය පරීක්ෂා කිරීමෙන් අපි ලැබූ අත්දැකීමය. යම්කිසි ජන්ම පත්‍රයක දෙවැන්නාධිපති හා එකොළොස් වැන්නාධිපති මාරු වී ඇත්නම් එවැනි අයට පහසුවෙන් මුදල් ලැබේ. තවද දෙවැනි භාවය තුළ ගුරු, බුධ, සිකුරු, ශනි උච්චව ස්වක්ෂේත්‍රව සිටීමද බලවත් ධන යෝගයකි. එවැනි යෝග තිබුණත් නැතත් කෙනකුට ලොතරැයි ඇදෙන ක්‍රමයක් අද ඔබට පෙන්වා

දෙමි. එක් එක් ලග්නවලට ලොතරැයි ඇදෙන ක්‍රම තිබෙන අතර,  මේෂ ලග්නයට මේෂ ලග්නයට ලොතරැයි ඇදෙන්නේ මෙහෙමයි. මේෂ ලග්නයට එකොළොස් වැනි භාවය එන්නේ කුම්භ රාශියයි. එවිට කුම්භ රාශියට අධිපති දිනය වන්නේ සෙනසුරාදා දිනයයි. එවිට ලොතරැයි ගන්න තිබෙන්නේ සෙනසුරාදා දින බුධ හෝරාව තුළදීයි. සෙනසුරාදා දින බුධ හෝරාව පටන් ගන්නේ පෙ.ව. 11.00 සිට 12.00 දක්වා කාලයයි.

එවිට මේෂ ලග්නකරුවන් ලොතරැයි ගත යුත්තේ සෙනසුරාදා දිනවල පෙ.ව. 11.00ත් 12.00ත් අතර කාලය තුළයි. මෙහිදී සෑම මාසයකම සෑම දිනයකදීම එකම වේලාවට හිරු උදා නොවේ. මේ නිසා ඒ දිනයන්හි හිරු උදාව අනුව වෙලාව සාදාගෙන ලොතරැයි ගත යුතු අතර තමාගේ ජය අංකයට අනුව ලොතරැයි ගන්න. මේෂ ලග්නකරුගේ ජය අංක වන්නේ 1, 4 වැනි අංකයන්ය.

වෘෂභ ලග්නයට

මීළඟට වෘෂභ ලග්නයට ලොතරැයි ඇදෙන ක්‍රමය බලමු. වෘෂභ ලග්න හිමිකරුවන්ගේ එකොළොස් වැන්න එන්නේ මීන රාශියයි. එවිට වෘෂභ ලග්නකරුවන් ලොතරැයි ගත යුත්තේ ගුරු දින එනම් බ්‍රහස්පතින්දා දිනයේය. ගුරු දින බුධ හෝරාව පටන් ගන්නේ පෙ.ව. 10.00 සිට 11.00 දක්වා කාලය තුළයි. මෙහිදී ද එදින හිරු උදාව සලකා ලොතරැයි ගන්න. වෘෂභ ලග්න හිමියන්ගේ ජය අංකය වන්නේ අංක 6ය.

මිථුන ලග්නයට

ඊළඟට මිථුන ලග්නකරුවන් ලොතරැයි ගත යුතු ක්‍රමය බලමු. මිථුන ලග්න හිමියන් එකොළොස් වැන්නේ මේෂ රාශියයි. එවිට මිථුන ලග්නකරුවන් ලොතරැයි ගත යුත්තේ අඟහරුවාදා දිනවලයි. කුජ දින බුධ හෝරාව පටන් ගන්නේ පෙ.ව. 09.00 සිට 10.00 දක්වාත්, පස්වරු නම් ප.ව. 04.00 සිට 05.00ත් අතර කාලය තුළයි. මිථුන ලග්නකරුවන්ගේ ජය අංක වන්නේ 3, 5 වැනි අංකයන්ය. මෙහිදී ද එදින හිරු උදාව අනුව වේලාව සකස් කරගෙන ලොතරැයි  ගතයුතු බව සලකන්න.

කටක ලග්නයට

කටක ලග්නකරුවන් ලොතරැයි ගත යුත්තේ සිකුරාදා දිනවලය. සිකුරාදා දිනවල බුධ හෝරාව පටන් ගන්නේ උදේ 07.00ත්, 08.00ත් අතර කාලය තුළයි. පස්වරුවේ නම් ප.ව. 02.00 සිට 03.00 අතර කාලය තුළයි. මෙහිදී පෙර පරිදිම ඒ ඒ දිනයන්හි හිරු උදාව අනුව වේලාව සකස් කරගන්න.

සිංහ ලග්නයට

මීළඟට සිංහ ලග්නකරුවන්ට ලොතරැයි ගත යුත්තේ බුධ දිනයි. බුධ දින බුධ හෝරාව පටන් ගන්නේ උදේ 06.00ත් 07.00 අතර කාලය තුළයි. පස්වරුවේ නම් ප.ව. 01.00, 02.00ත් අතර කාලය තුළයි. මෙහිදී ද හිරු උදාව අනුව වේලාව සකස් කර ගත යුතු අතර ජය අංක වන්නේ 1, 4 වැනි අංකයන්ය.

කන්‍යා ලග්නයට

කන්‍යා ලග්නකරුවන් ලොතරැයි ගත යුත්තේ සඳුදා දිනවලය. සඳුදා දිනවල බුධ හෝරාව පටන් ගන්නේ දහවල් 12.00ත් 01.00ත් අතර කාලය තුළදීය. රාත්‍රි නම් රාත්‍රි 07.00ත් 08.00ත් අතර කාලය තුළයි. පෙර සේම හිරු උදාව අනුව වේලාව වෙනස් කරගත යුතු අතර ඔවුන්ගේ ජය අංක වන්නේ 3, 5, 7 වැනි අංකයන්ය.

තුලා ලග්නයට

තුලා ලග්නයට ලොතරැයි ඇදෙන ක්‍රමය වන්නේ ඉරිදා දවස තුළ බුධ හෝරාවයි. ඉරිදාට බුධ හෝරාව යෙදෙන්නේ උදේ 08.00 සිට 09.00 දක්වා කාලය තුළයි. සවසට නම් ප.ව. 03.00 සිට 04.00 දක්වා කාලයයි. තුලා ලග්නකරුවන්ගේ ජය අංකය වන්නේ 6 ඉලක්කමයි. අනෙකුත් ලග්න වලට මෙන්ම තුලාවට ද ඒ ඒ දිනයන්හි හිරු උදාව අනුව වේලාව සකස් කරගන්න.

වෘශ්චික ලග්නයට

මීළඟට වෘශ්චික ලග්නයට ලොතරැයි ඇදෙන ක්‍රමය බලමු. එම රාශියට ලොතරැයි ගත යුත්තේ බදාදා දිනවලයි. බදාදා දිනවල බුධ හෝරාව පටන් ගන්නේ උදේ 06.00 සිට 07.00 දක්වාත් පස්වරු නම් 01.00 සිට 02.00 දක්වා කාලය තුළයි. රාත්‍රි කාලයට වුවත් බුධ හෝරාව සුබයි. වෘශ්චික රාශියට සුබ අංක වන්නේ 1, 2, 4 වැනි අංකයන්ය. මෙහිදී ද හිරු උදාව අනුව වේලා සකස් කරගන්න.

ධනු ලග්නයට

ධනු රාශි හිමි අයට ලොතරැයි ගැනීමට තිබෙන්නේ සිකුරාදා දිනවලය. සිකුරාදා බුධ හෝරාව උදා වන්නේ උදේ 07.00ත් 08.00ත් අතර කාලය තුළයි. 3, 5, 8 ජය අංකයන්ය.

මකර ලග්නයට

මකර රාශියට ලොතරැයි ගත යුත්තේ පෙ.ව. 09.00ත් 10.00ත් අතර කාලය තුළයි. ජය අංකය වන්නේ 7යි.

කුම්භ ලග්නයට

කුම්භ රාශියට ලොතරැයි මිලදී ගත යුත්තේ ගුරු දිනයි. ගුරු දින පෙ.ව. 10.00, 11.00ත් අතර කාලය තුළයි. ජය අංක වන්නේ 3, 7, 8 වැනි අංකයන්ය.

මීන ලග්නයට

මීන රාශියට ලොතරැයි ගත යුත්තේ සෙනසුරාදා දිනවල පෙ.ව. 11.00ත් 12.00ත් අතර කාලය තුළදීය. ප.ව. නම් 06.00ත්, 07.00ත් අතර කාලය තුළයි. ජය අංක වන්නේ 3, 9 වැනි අංකයන්ය.

සියලුම ලග්නකරුවන් ලොතරැයිපත් මිලදී ගත යුත්තේ ඒ ඒ දිනවලට හිරු උදාව අනුව හෝරාව සකස් කරගෙනය. මෙහිදී ඒ ලග්නවලට බුධ ග්‍රහයා එකොළොස්වැන්නට පැමිණෙන කාලසීමාව විශේෂ වන අතර කෙනකුගේ ධන යෝග යෙදී ඇත්නම් බුධ මහ දශාව හා බුධ අන්තරයත් විදශාවත් ලබා බුධ ග්‍රහයා කේන්දරයේ උච්චව ස්වක්ෂේත්‍රව මිත්‍රව සිටී නම් අනිවාර්යයෙන්ම කෙනකුට ලොතරැයි දිනුමක් ලැබෙන බව ජේ‍යාතිෂයේදී උගන්වයි.

හෝරාව යෙදෙන ආකාරය ලිතකින් හෝ ජේ‍යාතිෂ පත්‍රයකින් බලාගත හැකිය. රාත්‍රි කාලයට වුවත් බුධ හෝරාව යොදා ගැනීම සුදුසුය.

උපුටා ගැනීම මව්බිම