ඔබ මහා ධනවතකු කරන ප්‍රබල ග්‍රහයෝග

ප්‍රබල ධන යෝග පැවැතීම ජන්මියා මුදල්මය අතින් ඉහළ තත්ත්වයට පත්වීමකි. එය ධනයෙන් ආඪ්‍යවන පිහිටීමක් වේ. මෙවැනි පිහිටීම්වලදී කේන්දරයේ පවතින ප්‍රබල මිනුම් බලවත් ආධාරයක් වන බව පැහැදිලිය. පරාශර මතය පරිදි ‘පංචමං නවමං චෛව විශේෂං ධන මුච්චතේ’ යනුවෙන් දැක්වේ. ඒ අනුව 5 වැන්නෙන් හා 9 වැන්නෙන් විශේෂ ධන ලාභ ප්‍රකාශ කරන බව පැහැදිලි වේ.

5 වැන්නාධිපති හා 9 වැන්නාධිපති ආදී ග්‍රහයන් සමඟ තවත් යහපත් ආකාරයේ ග්‍රහයන් සම්බන්ධ වන්නේ නම් එය ධන යෝගයකි. ඔවුන් ඔවුන්ගේ දශා අනු දශාවලදී ධන සම්පත් හිමිවේ.

මේ අතර 11 වැන්නද යම් යම් භෞතික වස්තුන් ලාභ ප්‍රයෝජන ලැබීම සඳහා බලවත් ආධාරයක් වේ. එය ද්‍රව්‍ය ලාභ ඇතිකරන පිහිටීමකි.

දෙවැන්නද මෙලෙසින් ධනය සම්බන්ධයෙන් බෙහෙවින් බලපාන්නේය. බුධ, සඳු, ගුරු, සිකුරු වැනි ග්‍රහයන් උච්චව දෙවැන්නේ සිටියි නම් ජන්මියා මහත් ධනලාභ ලබන්නෙක් බව පිළිගැනෙයි. මේ ආකාරයෙන් 5, 9, 2,11 ආදී භාව ඊට අධිපතියෝ ධනය උත්පාදනය සඳහා බෙහෙවින් විශිෂ්ට බලපෑමක් ඇතිකරන බව දත යුත්තේය. පරාශර ආදී මහා ඍෂිවරු ඒ ඒ ලග්න දොළහට අදාළව ධනය ලැබෙන යෙදුම් මෙලෙසින් දක්වා ඇත.

මේෂ : 

රවි 5 වැන්නේ වේද සෙනසුරු, චන්ද්‍ර, ගුරු 11 වැන්නේ ද ජන්මියා ධනයෙන් ආඪ්‍ය වේ.

කුජ ලග්නයෙහි ස්වක්ෂේත්‍රව බුධ සමඟ සංයෝග හෝ දැක්මෙන් යුක්ත වේද එසේ නැතහොත් සිකුරු, සෙනසුරු වැනි ග්‍රහයන්ගේ සම්බන්ධතාවයකින් යුක්ත වේද ජන්මියා ධනවත් වේ. බුධ බහුලත්වය ඇති කරන ග්‍රහයා ලෙස සලකා මෙහිදී බුධගේ සබන්ධතාවය යොදා ගත්තායැයි සිතිය හැකිය.

වෘෂභ :

බුධහු 5 වැන්නේ වේද චන්ද්‍රයා කුජ සහ ගුරු 11 වැන්නේ වේද පුද්ගලයා ධනයෙන් ආඪ්‍ය වේ.

සිකුරු ලග්නයෙහි බුධ, සෙනසුරු වැනි ග්‍රහයන් සමඟ සම්බන්ධ නම් ඒ තුළින්ද ජන්මියා ධනවත් වේ.

මිථුන :

සිකුරු 5 වැන්නේ වේද කුජ 11 වැන්නේ වේද ජන්මියා මහා ධනවතකු වේ. බුධහු ලග්නයෙහි ගුරු සමඟ සංයෝග හෝ නැතහොත් ගුරුගේ දෘෂ්ටියෙන් යුක්ත වේද එමෙන්ම සෙනසුරු ද මීට සම්බන්ධ වේද ජන්මියා මහා ධනවතෙක් වේ.

කටක :

කුජ 5 වැන්නේ වේද සිකුරු 11 වැන්නේ වේද චන්ද්‍රයා ලග්නයේ බුධ සමඟ සංයෝගව හෝ ඔහුගේ දෘෂ්ටියට පාත්‍රවේද ගුරු ද එවැනි සංයෝගයකින් හෝ දෘෂ්ටියකින් වේද ඔහු ධනයෙන් ආඪ්‍ය වේ.

සිංහ :

බ්‍රහස්පති 5 වැන්නේ වේද බුධහු 11 වැන්නේ වේද ජන්මියා ඉමහත් ධනයෙන් ආඪ්‍යමත් වේ. රවි ලග්නයෙහි කුජ සමඟ හෝ කුජගේ දෘෂ්ටියට පාත්‍රවී සිටීද එමෙන්ම ගුරුගේ සම්බන්ධයක් තිබේද ඔහු මහා ධනපතියෙක් වේ.

කන්‍යා :

සෙනසුරු 5 වැන්නේ වේද රවි සහ චන්ද්‍රයා 11 වැන්නේ වේද ජන්මියා ධනයෙන් ආඪ්‍යමත් වේ. බුධහු ලග්නයෙහි ගුරු සමඟ හෝ ගුරුගේ දැක්මට පාත්‍රවේද එමෙන්ම සෙනසුරුගේ සම්බන්ධයකින් යුක්තද එවිට ද ජන්මියා ධනයෙන් ආඪ්‍යමත් වේ.

තුලා :

සෙනසුරු 5 වැන්නේ ද රවි සහ සඳු 11 වැන්නේ ද ජන්මියා ධනයෙන් ආඪ්‍යමත් වේ. එසේ නැතහොත් සිකුරු ලග්නයේ වී බුධ සහ ශනිගේ සංයෝගයෙන් හෝ දෘෂ්ටියෙන් යුක්තවේද එවිට ධනය ලබයි.

වෘශ්චික : 

ගුරු 5 වැන්නේ වේද බුධහු 11 වැන්නේ වේද බොහෝ ධනයෙන් යුක්තය. කුජ ලග්නයෙහි බුධගේ දෘෂ්ටියෙන් යුක්තද මේ සඳහා සිකුරුගේ හා කේතුගේ සම්බන්ධයක් වේනම් එයද ධනය ලැබෙන යෝගයකි.

ධනු : 

කුජ 5 වැන්නේ ද සිකුරු 11 වැන්නේද ජන්මියා බොහෝ ධනයෙන් යුක්ත වේ. එමෙන්ම බ්‍රහස්පති ලග්න ගතවී කුජගේ හා බුධගේ දෘෂ්ටියෙන් හෝ සංයෝගයෙන් යුක්ත නම් එවිට ද ඔහු ධනයෙන් ආඪ්‍යමත් වේ.

මකර :

සිකුරු 5 වැන්නේ වේද කුජ 11 වේද ජන්මියා ධනයෙන් ආඪ්‍යමත් වේ. සෙනසුරු ලග්නයෙහි කුජ, ගුරු ආදින්ගේ සම්බන්ධයෙන් හෝ දෘෂ්ටියෙන් යුතු වේද එවිට ද ධනය ලබයි.

කුම්භ :

බුධහු 5 වැන්නේ වේද චන්ද්‍රයා බ්‍රහස්පති හා කුජ සමඟ 11 වැන්නේ වේද ජන්මියා ධනවතකු වේ. සෙනසුරු ලග්න ගතවී කුජ ගුරුගේ සම්බන්ධයකින් හෝ දෘෂ්ටියෙන් යුක්ත නම් ඒ තුළින් ද ධනවත් වේ.

මීන :

චන්ද්‍රයා 5 වැන්නේ වේද නැතහොත් 11 වැන්නේ වේද ඔහු ධනයෙන් ආඪ්‍යමත් ය. බ්‍රහස්පති ලග්නයෙහි කුජ සමඟ හෝ බුධ සමඟ සිටියි ද නැතහොත් දෘෂ්ටියට පාත්‍රවේද ධනයෙන් ආඪ්‍යමත් වේ.

ආචාර්ය ජී. ඇම්. ගුණපාල

උපුටා ගැනීම සුබසෙත